Program BERMUTU Gugus II Telagasari

Program BERMUTU (Better Education through Reformed Management and Universal Teacher Upgrading)  di KKG (Kelompok Kerja Guru) Gugus II UPTD (Unit Pelayanan Teknis Dinas) TK, SD Kecamatan Telagasari, Karawang, dilaksanakeun di sekretariat KKG Gugus II, nyaeta SDN Telagasari I, jeung di  SD-SD anggota Gugus II sacara bagilir. Pertemuan dilaksanakeun dua kali dina saminggu, Rebo jeung Saptu, dimimitian bulan kamari nepi ka rengse 16 pertemuan.

KKG Gugus II, salah sahiji KKG  ti 3 KKG di UPTD TK, SD Kecamatan Telagasari  nu pernahna di Blok Tengah, nu sejenna, Blok Kaler KKG Gugus I jeung Blok Kidul KKG Gugus III. Anggota KKG Gugus II  ti tatar wetan nepi ka tatar kulon Kecamatan Telagasari nyaeta guru-guru ti: SDN Linggarsari I, SDN Pulosari, SDN Ciwulan I, SDN Cadas Kertajaya I, SDN Cadaskertajaya II, SDN Kalibuaya II, SDN Telagasari I, SDN Telagasari II,    SDN Telagasari III,    SDN Telagasari IV jeung SDN Pasirmukti. 

Program BERMUTU,  proyek ti Ditjen PMPTK (Direktorat Jendral Peningkatan Mutu Pendidik dan Tenaga Kependidikan), Depdiknas (Departemen Pendidikan Nasional), ngaliwatan LPMP (Lembaga Penjaminan Mutu Pendidikan) dilaksanakeun pikeun ngaronjatkeun ajen guru, kepala sekolah jeung pengawas di tingkat lokal ku cara ‘ngaberdayakeun’ saniskara kelompok kerja jeung musyawarah kerja, sarta forum kelompok kerja jeung forum musyawarah kerja.

“KKG Gugus II salah sahiji kelompok kerja guru di Kecamatan Telagasari, terus-terusan digembleng pikeun ngaronjatkeun ajen anggotana,” ceuk Pengawas TK/SD Ade Taryana, S.Pd.  nu wilayah binaanna di Gugus II, disagedengeun Ketua KKG Gugus II, Usep Mulyana, jeung Kepala SDN Telagasari I, Dahiyat, S.Pd. nalika Giwangkara nepungan di salah sahiji kagiatan “On Sevice” BERMUTU, di SDN Cadaskertaya I Rebo (2/2) anu kaliwat.

Saterusna Ade Taryana netelakeun, dilaksanakeunna kagiatan di tempat-tempat nu beda-beda sacara bagilir tujuanna sangkan guru-guru anggota KKG mikawanoh tempat kerja anggota sejenna. Guru-guru nu tugas di “kota” jadi apal kaayaan sakola nu aya di “pasisian”, kitu deui sabalikna.

Dilaksanakeunna dua kali dina saminggu, nyaeta, Rebo pikeun guru-guru Kelas Rendah (I, II, III)  jeung Saptu pikeun guru-guru Kelas  Tinggi (IV, V, VI),  sangkan kagiatan PBM (proses belajar-mengajar) di sakola masing-masing tetep lumangsung, bari jeung guru-guru bisa ngalaksanakeun ieu program dina jam kerja. Kitu ceuk Ade Taryana, S.Pd.

(Sunta Atmaja)

Desa Siaga di Ciampel

Desa siaga,  mangrupa kondisi di tingkat masarakat  desa nu mibanda kamampuh ngarengsekeun masalah saluyu jeung potensi nu geus aya,  sarta dina kaayaan darurat siap siaga nyanghareupan masalah kasehatan jeung  bencana alam. Hiji desa geus mibanda desa siaga lamun eta desa sakurang-kurangna mibanda hiji Pos Kesehatan Desa (Poskesdes) nu dilola ku saurang bidan jeung dua urang kader.

“Di Kecamatan Ciampel aya 7 desa siaga, nyeta: Parungmulya, Kutamekar, Kutanegara, Kutapohaci, Mulyasari, Mulyasejati jeung Tegallega,” ceuk Kepala UPTD Puskesmas Ciampel, Hj. Aan Anasih, SKM, nalika ditepungan Giwangkara anyar-anyar ieu.

Saterusna Hj. Aan netelakeun, salah sahiji desa di Ciampel mangrupa desa siaga nu pangunggulna di Kabupaten Karawang, nyaeta Desa Siaga Kutapohaci. Kukituna, Desa Kutapohaci kudu jadi conto ku desa-desa sejenna, minimal di Kecamatan Ciampel, dina widang desa siaga, sarta dirojong ku hal sejenna, henteu ukur mangrupa program tapi dina wujud nu nyata, contona, kabersihan lingkungan mah kudu tembong kagiatan jeung fisikna.

Komo deui, Desa Kutapohaci mangrupa puseur Kecamatan Ciampel nu salawasna jadi pangjugjugan warga desa ti sakuliah Ciampel. Malah jadi pangjugjugan jeung pangliwatan warga ti luar Kecamatan Ciampel jeung ti luar Kabupaten Karawang,   utamana warga nu digarawe di pabrik-pabrik  di wilayah industri Ciampel.

“Kaayaan jalan di jalur utama mah kedah katingal karapihan sareng kabersihanana. Ulah dugi ka aya jukut nu ngajejembrung diantep wae,” ceuk Hj. Aan Anasih, SKM di ahir obrolan jeung Giwangkara. (Sunta Atmaja)

Poe Basa Indung Internasional Dipieling Unggal 21 Februari Ku Umat Sadunya

Bulan November 1999 Konferensi Umum UNESCO (United Nations Educational, Scientific and Cultural Organization) Perserikatan Bangsa Bangsa (PBB)  ngaproklamasikeun Poe Basa Indung Internasional (International Mother Language Day).

Poe pangeling-ngeling nu sok dirayakeun ku umat sadunya teh munggaran  dilaksanakeun tanggal 21 Februari 2000 tur ditalungtik unggal taun kumaha pangaruhna kana lumangsungna  sarta mekarna kaananeka-ragaman basa jeung budaya dunya.

Dipielingna  Poe Indung Internasional dina  ieu tanggal dumasar kajadian taun 1952, nalika demonstrasi mahasiswa mertahankeun basana, basa Bengali, salah sahiji basa indung di Pakistan. Harita 4 mahasiswa katembak ku polisi tur tiwas di Dhaka, nu ayeuna jadi ibu kota Bangladesh.

Kajadianana, taun 1947 provinsi Bengali mangrupa bagian ti India. Ieu provinsi dibagi dumasar agama nu diagem ku umat nu panglobana. Tatar kulon jadi bagian India, tatar wetan jadi provinsi Pakistan nu dipikawanoh Bengali Wetan nu engkena jadi   Pakistan Wetan. Tuluy lumangsung papaseaan sual ekonomi, budaya, jeung basa, antara Pakistan Kulon jeung Pakistan Wetan (engkena Pakistan Wetan jadi Banglades).

Puncak papaseaan timbul taun 1948 nalika pamarentah Pakistan ngadeklarasikeun yen Urdu mangrupa hiji-hijina basa nasional. Hal ieu nimbulkeun protes ti panyatur basa Bengali nu lolobana di Pakistan Wetan. Pamarentah nandeskeun yen nu protes henteu sah, di luar jalur hukum. Ahirna, tanggal 21 Februari, 1952, para mahasiswa Universitas Dhaka jeung aktivis sejenna ngayakeun demo tur kajadian tiwasna 4 mahasiswa tea. 

Di Banglades, tanggal 21 Februari mangrupa  poe pangeling-ngeling anu pangpentingna dina sajarah nagarana. Jalma-jalma biasana neundeun kekembangan dina “Shaheed Minar” (monumen sahid), ngayakeun pesta, lomba sastera, jsb. Poe ieu mangrupa  “perayaan”  budaya Banglades jeung basa Bengali.

Tanggal 19 Februari 2006, di Taman Ashfield, Sydney, Australia,  dibangun “memorial” Poe Basa Indung Internasional,  mangrupa batu tulis  dina podium nu luhur. Dina beungeut batu aya ukiran “Shaheed Minar” jeung ukiran dunya, sarta tulisan, “Kuring sarerea baris mieling sahidna 21 Februari” make basa Inggris jeung basa Bengali, sarta kecap-kecap make lima hurup alfabet, nuduhkeun simbul basa indung di lima benua.

Tanggal 16 Mei 2009 Majlis Umum PBB dina resolusina A/RES/61/266 cumeluk ka  nagara-nagara anggotana  sangkan miara tur ngajaga kalanggengan basa-basa nu digunakeun di dunya.  Dina resolusi nu sarua Majlis Umum oge ngaproklamasikeun, taun 2008 minangka Taun Basa Internasional, pikeun lumangsungna hirup sauyunan di dunya internasional  kalayan ngagunakeun basa nu beda-beda (multilingualism) jeung budaya nu beda-beda (multiculturalism).

Taun 2011 ieu, di tatar Sunda, dina raraga mieling Poe Basa  Indung Internasional, sawatara paguyuban Sunda ngayakeun saniskara acara kasundaan, diantarana,  Senen, 21 Februari, Paguyuban Panglawungan Sastra Sunda (PP-SS) gawe bareng jeung Bale Rumawat  Unpad Bandung ngagelar acara Pasanggiri Tarucing Cakra, Peluncuran 5 Unit Buku Anyar, jeung Aki Nini Baca Sajak, di Gedong Bale Rumawat Unpad, Jl. Dipati Ukur No. 35 Bandung.

Dipiharep, ku dilaksanakeunna acara mieling Poe Basa Indung Internasional taun 2011 ieu, kaum ibu kaingetan yen dirina mibanda peran utama dina ngenalkeun basa indung ka para putrana saperti nu ditetepkeun ku UNESCO.  (Sunta Atmaja)